Asawa sa CVO nga gipatay misinggit og hustisya

OZAMIZ CITY: Hustisya ang gisinggit karon sa asawa sa usa ka sakop sa Civilian Volunteers Organization (CVO) sa barangay Catadman human nakit-ang patay ang iyang bana nga gilabay  nga wala nay kinabuhi sa sitio Bangkal, Aguada, Ozamiz City.

Nakit-an nga wala nay kinabuhi sa sulod sa kanal si Mario Edios, 38 anyos  alas singko sa buntag niadtong Hunyo 29.

Gipadayag ni Yolanda Edios, asawa sa biktima nga wala makauli ang iyang bana human nga milakaw kini Hunyo 28 sa may alas tress a hapon.

Hinungdan nga gibati usab sila og kabalaka. Nakurat na lamang sila nga sa dihang iyang gitawagan ang cellular phone niini, polis na ang nakatubag nga mipadayag nga nakit-ang patay ang iyang bana ug gidala na kini sa Gamalinda Funeral Parlor.

Saysay sa asawa nga wala siyay namatikdan nga kaaway sa iyang bana nga mihimo sa maong pagpatay niini.

Tungod niini nanawagan siya sa mga sakop sa kapolisan nga palawman pag-ayo ang imbestigasyon sa kamatayon sa iyang bana aron masikop ang mga suspetsado aron mahatag ang hustisya  niini.

Namatikdan nga adunay samad pinusilan ang ulo sa iyang bana nga posible nga maoy hinungdan sa hinanaling kamatayon niini.