Koko Pimentel bisita sa oath taking sa Ozamiz

OZAMIZ CITY: NAHIMONG pinasidungang dinapit ug administering officer sa Ozamiz City si Senador Aquilino ‘Koko’ Pimentel, Jr.,  niadtong Hunyo 28 sa gipahigayon nga mass oath taking sa mga napiling opisyal sa nakalabay nga May 13 elections.

Hingpit nga nanumpa sila si Ozamiz City mayor elect Reynaldo ‘Aldong’ Parojinog, Sr.,ug  Vice-mayor elect Nova Princess Parojinog-Echavez atubangan ni Pimentel.

Lakip usab sa mga nanumpa ang mga napili nga mga konsehal sa Ozamiz. Kini naglangkob nila ni  Octavio Parojinog, Jr., Baraks Cantago, Mikel Tagal, Matronilo ‘Loloy’ Cartajenas, Rico Auman, Girlet Launsing, Dodong Saquin, Fritz Neil Balgue, Romeo Jimenez, ug Taryn Mecaros.

Sa  iyang mensahe, gipadayag ni Pimentel nga adunay daghang proyekto nga iyang ibubo sa lalawigan sa Misamis Occidental human nga nakakuha sa taas nga botos sa nakalabay nga election niadtong Mayo 13.

Saysay niini nga lakip sa iyang gibisita ang Ozamiz City ilabina nga ang iyang amahan nga si kanhi Senate President Aquilino Pimentel, Sr., suod usab ni Ozamiz City mayor elect Reynaldo Parojinog, Sr.

Sa iyang kabahin, gipadayag ni vice-mayor Echavez nga adunay daghang kalambuan nga ilang dalhon sa Ozamiz City pinaagi sa ilang tandem sa iyang amahan.

Gidugang niini nga dinhi nila ipakita sa katawhan ang ilang sukli sa pagsalig sa katawhan sa dakbayan.

Nahimong emosyonal usab si Mayor elect Parojinog sa paghatag sa iyang mensahe atol sa gipahigayon nga oath taking ceremony.

Iyang gipasalamatan ang mga katawhan nga nagpaluyo kaniya lakip na ang mga barangay kapitan nga misuporta sa nakalabay nga piniliay.