Opisyal sa barangay nga walay pakabana sa shabu kasohan

OZAMIZ CITY--PASAKAAN og kaso ang mga opisyal sa mga barangay sa Ozamiz kon dili magpakabana sa pagsulbad sa illegal drugs ug illegal nga sugal sa ilang matag dapit.

Gipadayag ni Ozamiz City Mayor Reynaldo Parojinog, Sr., nga kinahanglan nga mga bag-ong nanumpa nga mga kapitan ug mga konsehal sa 51 ka barangay mohimo og lakang may labot sa pagsulbad sa suliran sa droga.

 Gipunting usab niini nga kinahanglan nga sulbaron ang droga ug ang video karera tungod kay mag-uban kining duha.

Labing mikusog ang panawagan ni Parojinog human sa nahitabo nga paggabas sa liog sa usa ka dos anyos nga batang lalaki sa barangay Tinago, Ozamiz City ug ang suspetsado mao ra usab ang adik nga amahan niini. Gani si Parojinog nakahilak sa nahitabo sa linuog nga pagpatay sa maong bata nga gigabas ang liog gamit ang gabas sa kahoy.

Nasayran nga nabulag gayud ang ulo sa biktima ngadto sa iyang lawas gumikan sa linuog nga gihimo sa kaugalingong amahan niini. Saysay sa mayor nga dili maayo ang nahimong epekto sa utok ngadto sa mga naggamit og shabu, hinungdan nga labing gipalagsik niini karon ang pagsulbad sa illegal mnga droga. Tungod niini siya nanawagan sa mga barangay opisyal nga moalayon sa pagsulbad sa maong suliran sa droga sa dakbayan sa Ozamiz City.

 Gani gisaysay ni Parojinog nga ang bisan kinsa nga opisyal sa barangay nga iyang nabalitaan nga dili moalayon sa iyang kampanya siya mismo ang mangunay sa pagpasaka og kaso. Nanawagan usab siya sa katawhan nga moalayon aron mahatagan og kasulbaran ang maong problema.

 Kahinumduman nga una na usab nga gisaad ni Parojinog nga hinluan ang dakbayan sa Ozamiz sa illegal nga droga paanahon sa kampanya sa iyang subling pagpapili isip mayor sa dakbayan.