Amahan nga migabas sa liog sa iyang anak, nagmahay

OZAMIZ CITY--MIPABATI sa pagmahay ang usa ka amahan nga migabas sa liog sa iyang dos anyos nga batang lalaki human kini mahuwasi sa epekto sa shabu nga gisuyop niini.

 Ang suspetsado nga si Apolinario Bacang, 36 anyos mipadayag nga nakurat na lamang siya sa dihang daw napugwat kini nga ang iyang anak nga si Mark Andy ang iyang gigabas ang liog ibabaw sa lamesa. Saysay niini nga daw sa adunay mihonghong kaniya nga dili niya anak ang maong bata ug iyang nakita nga nausab ang nawong niini.

 Sa pagpakighinabi sa dxDD-AM news team, gipadayag ni Bacang nga usa ka semana na siya nga walay maayong tulog sa wala usab niya ikaasoy nga hinungdan. Hinuon, sa sinugdan milimod pa si Bacang nga migamit siya og shabu apan sa pagpakighinabi sa tulomanon nga Isyu 657 mitug-an kini nga naka-shabu siya sa maong hitabo.

 Gumikan sa pagmahay nanawagan si Bacang ngadto sa mga namaligya og shabu nga undangon na ang maong buhat tungod kay makaguba, makabungkag sa pamilya ug mokalas pa gayud og kinabuhi.

Nanawagan usab siya sa mga sama kaniya nga naggamit og shabu nga undangan na kini tungod sa dili maayong epekto. Lakip sa iyang gipanawagan ang mga sakop sa kapolisan nga kinahanglan nga mohimo usab og lakang sa pagsulbad sa maong makabuang nga bisyo.

 Saysay usab ni Bacang nga andam niya nga dawaton unsa man ang mahimong silot sa iyang pagpatay sa kaugalingong anak tungod lamang sa epekto sa shabu.

 Mihilak si Bacang nga miatubang sa dxDD-AM News Team apan nasayod usab siya nga ang pagtulo sa iyang mga luha dili na kini makapabalik pa sa kinabuhi sa iyang dos anyos nga anak.