Mimahal ang bugas sa Ozamiz

OZAMIZ CITY--MISAKA ang presyo sa bugas humay sa Ozamiz City gumikan kay mao karon ang gitawag nga lean season gumikan kay walay ani niining mga panahuna.

Gipadayag ni  Ycong, presidente sa Rice and Corn Grain Retailers sa Ozamiz  City nga misaka og P2 ang presyo sa bugas humay nga mapalit sa mga tindahan sa Public Mall o sa mga nasakop sa ilang kahugpungan.

Gidugang niini nga ang local rice nga kaniadto mapalit sa P32 ngadto sa P33 ang matag kilo karon mapalit na sa P35 ngadto sa P36.

Samtang ang premium rice nga mapalit sa P37 ngadto sa P39 ang matag kilo karon mapalit na sa tag P40 ngadto sa P42.

Saysay ni Ycong nga dili angay nga mabalaka ang katawhan tungod kay normal kini nga kahimtang ilabina nga walay ting-ani karong panahuna.

Gani gipasabot niini nga sa katapusang semana sa bulan sa Agosto ug sa unang semana sa bulan sa Septiyembre dako ang posibilidad nga mobalik sa pag-ubos ang presyo sa bugas tungod kay mao na usab kini ang panahon sa ting-ani.

Gidugang sa pagsugilon ni Ycong nga mobalik ang naandan nga presyo niini pasabot nga mo-ubos og P2 ang matag kilo.

Samtang sa pikas nga bahin, gipasabot ni Ycong nga adunay igong supply sa National Food Authority (NFA) nga mapalit sa tag P27 ang matag kilo.(NEPTALIE BATOLENIO)