Mga sundalo gipakatag sa 15 ka barangay

TANGUB CITY—Mokapin sa 100 ka mga sundalo ang gipakatag karon sa 15 ka mga barangay niining dakbayan alang sa pag-abag sa pagpahigayon og bayanihan kon pagtabang sa katawhan aron nga mahuptan ang kalinaw ug kalambuan.

 Gipagayag ni Colonel Apolinario Alloba, brigade commander sa 101st Brigade sa Philippine Army nga nakabase sa Pinan, Zamboanga del Norte nga dili gubat ang tuyo sa mga sundalo sukwahi sa mga espekulasyon nga mogawas apan aron nga motabang sa pagkab-ot sa kalamboan. Saysay niini nga kon ugaling adunay mga armado nga nagtinguha og kagubot, ang militar andam nga panalipod sa katawhan. 

Gidugang niini nga tumong sa maong mga kasundalohan ang pagpasibaw sa bayanihan program aron mabati sa katawhan sa barangay ang kamahinungdanon sa pagtinabangay.

Saysay niini nga ang 15 ka mga barangay ang nahilakip sa ilang bayanihan tungod kay gawas nga anaa na kini sa bukirang bahin aduna pa usab silay nadawat nga mga taho nga presensiya sa mga armado hinungdan nga buot usab nila nga panalipdan ang katawhan.

Sa iyang kabahin, positibo ang pagdawat ni Tangub City Mayor Philip Tan sa maong programa ilabina nga katambayayong kini sa pagpatuman sa dugang kalamboan sa barangay. Ang maong mga barangay naglangkob sa Barangay San Antonio,Sicot,Owayan,Matugnaw,Simasay,Baluc,Catagan,KJimat, Santo Ninio, Salimpono,Bongabong,Capalaran,Guinabot,Kauswagan ug Silangit.