Dunay igong supply sa bugas—NFA-MisOc

OZAMIZ CITY--WALAY angay nga kabalak-an ang katawhan sa Misamis Occidental sa supply sa bugas sa National Food Authority (NFA). 

Gipadayag ni Mila Tanguamos, officer in charge sa NFA-Misamis Occidental nga adunay igong pundo sa bugas ang NFA ug bastante na kini nga maka-supply sa katawhan sa lalawigan. 

Gani gipahinumduman usab ni Tanguamos ang mga licensed grain retailers nga nakabase sa mga public markets sa pagbisita sa buhatan sa NFA aron nga sila maka-withdraw sa ilang panginahanglanong bugas alang sa mga konsumante. Saysay niini nga ang NFA rice mapalit og tag P27 ang matag kilo sa mga nagkdaiyang merkado publiko sa Misamis Occidental. 

Gidugang sa pagsugilon ni Tanguamos pinaagi sa usa ka press release nga andam kanunay ang NFA sa pag-abag ilabina panahon sa mga emerhensiya ug kalamidad. 

Tungod niini iyang giawahag ang mga local government units nga makigdugtong ug moduso sa ilang rice loan memorandum of agreement tali sa NFA aron malikayan ang mga kahasol sa dihang magkinahanglan og bugas panahon sa mga kalamidad. 

Gipasalamatan usab sa NFA ang tanan nga mga stakeholders nga naglangkob sa mga mag-uuma, grainsbusinessmen, LGUs ug media sa makanunayon nga suporta ngadto sa ilang buhatan.(NEPTALIE BATOLENIO)