TANGUB CITY—Kasong carnapping ang giandam karon sa
kapolisan niining dakbayan batok sa duha ka mga suspetsado nga nabawian og
kinawat nga motor single.
Temporaryo karon nga gisulod sa Tangub City detention
cell ang usa ka Danilo Libatog nagpuyo sa Dimaluna, Ozamiz City ug anaa sa
kuwerpo sa kapolisan ang usa ka Jeje, minor de edad human madakpi sa hinusang
puwersa sa kapolisan.
Gipahayag ni Police Chief inspector Joey Ampong, hepe sa
kapolisan nga unang nasikop si Libatog human nga ang usa ka Geneses Gutang
nagpuyo sa Santa Cruz, Tangub City miasoy nga ang iyang motor single nga
gikawat iyang nakit-an sa Ozamiz City nga gisakyan sa maong suspek.
Sa dihang mipahimutang og check point ang kapolisan,
miaagi usab gilayon ang maong suspek sakay sa nasangpit nga motor single apan
sa dihang gipara wala kini mohunong.
Hinungdan nga nahitabo ang ginukdanay ug naapsan kini sa
Purok 6, Dimaluna, Ozamiz City.
Sa interogasyon sa kapolisan, gipadayag ni Libatog nga
ang maong motor single giprenda kaniya og P2,300 diin giunhan kini niya og P300
sa usa ka Jeje ug wala siyay kasayuran nga kini kinawat.
Tungod niadto, gihimo gilayon ang usa ka entrapment
operation.
Pinaagi sa text message sa cellular phone nakontak si
Jeje aron makigkita ni Libatog aron kompletohan na ang pagbayad sa kulang sa
motor single.
Sa dihang midangat ni si Jeje sa lugar nga gikasabutan,
wala na kini makaporma alang sa pag-ikyas sa dihang kalit kining gidasmagan sa
mga operatiba sa kapolisan.
Sa imbestigasyon, giangkon sa maong Jeje nga nagpailang
minor de edad nga siya ang nagkawat sa maong motor single tungod kay mi-order
kaniya si Libatog. Gialkontra usab niini ang pahayag ni Libatog nga wala kini
kasayuran nga kinawat ang maong sakyanan.
Saysay ni Jeje nga nasayod si Libatog nga ‘karnap’ ang
motor single.
Sa pagkutlo niining taho, gihulat karon sa kapolisan nga
makapakita si Jeje og birth certificate tungod sa gitug-an niini nga edad nga
16 anyos.
Nasayran nga wala nay ginikanan ang maong minor de edad
ug 2010 pa aduna na kini record nga nalambigit sa pagpangawat.
Nagtoo usab si Ampong nga ang pagkasikop sa duha
mamahimong dalan sa pagkasulbad sa laing 5 ka mga motor nga gikarnap nga diha
lamang giparada sa gawas sa panimalay.(BETHSER DABLO)
0 comments:
Post a Comment