USA lamang ka disinformation o walay kamatuoran ang
mikatag nga mga text messages nga adunay mahitabo nga all out war tali sa Moro
Islamic Liberation Front (MILF) ug sa gobiyerno.
Kini ang gikompirma ni Ghadzali Jaafar, Vice-Chair for
Political Affairs, MILF Central Committee sa phone patch interview sa dxDD-AM
sa Ozamiz.
Una niini adunay pipila ka mga texters ang nabalaka sa
ilang nadawat nga text message nga nakalatid nga padulong ngadto sa regional
director sa Police Regional Office XI nga ang kasayuran giduso ngadto sa Police Regional Office XII nga mipahibalo sa
tanang katawhan sa Mindanao sa mahitabo ang pagsirado sa mga kalsada padulong
sa Tacloban, GenSan, Cotabato, Kidapawan, Davao, Cagayan, ug Pagadian City.
Gidugang sa maong text message nga adunay order ang Central Committee nga adunay mahitabo nga all out war tali sa
MILF ug gobiyerno. Kini tungod sa giiliad sa Government’s Bangsamoro Framework
Agreement and MILF. Dason pa niini nga wala nay pulos ang sinultihay sa
kalinaw. Gilatid sa maong mensahe nga ang Bangsa Moro Islamic Freedom Fighter (BIFF)
ug Bangsa Moro Islamic Armed Froces (BIAF) mosalmot sa pag-atake sa tanang
government detachment ug nga checkpoints hinungdan nga gipahimangnuan ang
katawhan nga mag-amping.
Gidugang ni Jaafar nga walay kamatuoran ang maong text messages
ug posible nga kahimuan lamang sa mga tawo nga gusting samokon ang sinultihay
sa kalinaw tali sa gobiyerno ug sa MILF.
Sa iyang kabahin, gipadayag ni Miriam Coronel-Ferrer,
chief government negotiator nga bisan sa upat ka bulan nga pagpakahilom maayo
gihapon ang dagan sa peace process.
Ang pahayag usab ni Coronel-Ferrer maoy reaksiyon sa
migawas nga taho sa media nga nahitabo nga wala ‘makalihok o napundo’ sa
pagpakigsabot nga miresulta sa pagkalangan sa pagkompleto sa mga Annexes sa Framework
Agreement on Bangsamoro (FAB).
Gipaklaro ni Coronel-Ferrer nga adunay mga pormal ug
impormal nga mga komunikasyon nga nagpadayon pinaagi sa mga tigpasayon ug sa
laing mga agianan.
Gumikan sa bakak nga mga text messages nanawagan karon
si Coronel-Ferrer ngadto ni Presidente Benigno Aquino III ug ni MILF Murad
Ibrahim, AL Hadj sa paghatag og kasegurohan sa publiko nga padayon sila nga
nagbarog alang sa sinultihay sa kalinaw pinaagi usab sa pagpirma gilayon sa
komprensibong kasabutan.
0 comments:
Post a Comment