Kanhi-bise mayor Romero gipasakaan og kaso sa Lumad Misamisnon Crew

MIDUSO sa buhatan sa piskaliya sa Ozamiz  og kasong criminal ang Lumad Misamisnon TV team ngadto kang kanhi bise-mayor Rolando Romero.

Si  Romero ang napilding kandidato sa pagkamayor sa Ozamiz ilalom sa Liberal Party.

Mipasaka og kaso si Elena Pelare, kasamtangan nga public information officer sa Ozamiz City government, part time broadcaster ug maoy nagdumala sa Lumad Misamisnon TV.

Sa upat ka pahina nga reklamo ni Pelare, gipasakaan og kaso niini si kanhi vice-mayor Roland Romero, Gingging Justiniani sa Bagakay, Ozamiz City, Benjie Ocso sa Tinago, Ozamiz City ug lakip na ang duha ka mga sakop sa kapolisan.

Ang maong mga polis sila si Police officer 1 Gemuel Romo Hermosisima ug PO1 Albert Capa Maputi sa kasong robbery, attempted robbery, attempted murder, destruction of personal property, illegal detention ug harassment.

Samtang sa pito ka pahina nga complaint affidavit ni Danilo Pilar, legal officer sa Department of Agrarian Reform sa Misamis Occidental, part time TV broadcaster gipasakaan og kasong criminal niini si Romero tungod sa pagpang-harass niini niadtong Mayo 12, 2013.

Sa gipanumpang pahayag nila ni Pilar ug Pelare managsamang gipadayag niini nga niadtong Mayo 12 samtang nagpahigayon ang ilang team sa election coverage nga naglangkob nila ni Melito Opena,camera man  ug Giovanne Lumapas, anchor/reporter  ilang namatikdan nga adunay daghang mga tawo sa Barangay Dona Consuelo nga nagtapok-tapok hinungdan nga ila kining gisundan.

Didto ilang nakita ang grupo ni Romero nga sa ilang pagtuo adunay nahitabo nga vote-buying. Gidugang sa pagsaysay niini nga nasuko si Romero ug sa dihang giduol kini ni Pilar aron nga hinabion wala kini motingog.

Hinungdan nga mibalik si Pilar sa ilang giabangan nga van niadtong higayuna. 

Tinguha nila nga mobiya sa Van ana gibabagan sila sa usa sa mga sakyanan ni Romero hinungdan nga naglisod sila sa paggawas niadto.

Pipila ka minutos ang milabay, giduol ni Pilar si Romero aron nga hinabion may labot sa ‘daw gi-hostage’ nila nga kahimtang. Apan kalit lamang nga gilabni ni Romero ang microphone nga gigunitan ni Pilar.

Nahitabo ang pag-atake ni Romero ngadto ni Pilar nga dali usab dayon nga midagan.  Nabalhin usab ang atensiyon ni Romero ngadto kang Lumapas nga maoy naghawid sa video camera nga misukmag niini apan wala makaigo.

Samtang ang laing camera man nga si Opena ang gihawiran sa duha ka mga polis ug nailog ang video cam niini nga gibundak pa kini.

Samtang  usa ka Benjie Ocso ang namunit sa nawasak nga camera ug gikuha ang video tape niini.

Sibo sa maong affidavit gitionan ni Romero si Opena ug gikablit nang kalibre 45 apan wala kini mobuto.

Samtang ang Nikon D300 nga gigunitan ni Pelare ang gikuha usab ni Romero.

Nagkatibulaag og panagan ang grupo nila ni Pelare samtang gigukod sila sa grupo ni Romero.

Kahinumduman nga sa dihang gihinabi si Romero may labot sa maong hitabo, gipadayag niini nga siya maoy gi-provoke ni Pilar hinungdan nga nahitabo kadto.

Wala pa usab makuhaai og reaksiyon si Romero may labot sa pagpasaka og kaso batok kaniya .(NEPTALIE BATOLENIO)