Bise-mayor mipahimangno sa mga empleyado nga adunay personal interes

OZAMIZ CITY:GIPAHIMANGNUAN ni Ozamiz City Vice-mayor Nova Princess Parojinog-Echavez ang mga empleyado sa City Hall nga adunay personal nga mga interes.

Gisaysay niini nga adunay mga empleyado nga mohimo lang og istorya aron dauton ang ilang pamilya pinaagi sa mga sulsol sa katarungan nga aduna kini personal nga mga interes nga dili na makalusot human nga iyang gipatuman ang mga reporma sa dakbayan sa dihang nangatungdanan siya nga mayor sa Ozamiz.

Gidugang niini nga sa taas nga higayon nagpakahilom lamang siya may labot niini apan karon na ang panahon nga atubangon niya ang maong mga tawo.

Saysay sa bise-mayor ang maong mga tawo adunay mga “palusot” nga mga ginahimo nga maoy nakapamaot sa ngalan sa iyang amahan taliwala sa kaayo niini. 

Gipunting ni Echavez nga adunay migawas nga estorya nga siya ang gitawag og ‘nawong og kuwarta’ sa maong mga empleyado kini sa katarungan nga dili na makalihok tungod kay sa iyang pagdumala iya na kini nga gibantayan. Gidugang sa pagsugilon ni Echavez nga migawas kini tungod ka yang maong mga empleyado dili na makapanapi ug makapalusot tungod sa iyang gihimong mga reporma.

Gilabtikan usab ni Echavez ang giingong mga “tawo” nga nagpalibot sa iyang amahan nga mibati og kalipay kay nabalik na si Ozamiz City Mayor Reynadlo Parojinog, Sr., apan iyang gipaniguro nga siya ang dakong babag niini nga dili na makahimo og mga palasuot.

Gitumbok usab ni Echavez ang City Engineer’s office nga gipang-ipit-ipit ang mga proyekto hangtud nga ma-realign na lamang ang budget niini. Nanawagan si Echavez nga malihok dayon sa buhatan sa Enhenyero ang mga proyekto sa kadalanan sa mga barangay ilabina nga nagkdaduol na usab ang Barangay elections ug posible nga maigo na usab kini sa election bond.

Saysay ni Echavez nga dili niya patuloan og luha ang mga tawo nga nagpahimulos sa siyam ka tuig nga pangtungdanan sa iyang amahan. Hinuoon nanawagan siya sa tanan nga mohimo og mga lakang may labot sa paghatod sa tinuod nga serbisyo ngadto sa katawhan.

Gipasalig ni Echavez nga ang dahuman nga city council sa katawhan nakatutok alang sa kalambuan sa dakbayan.