Negosyante sa Ozamiz, giposil-patay

OZAMIZ CITY--HIKABSAN sa kinabuhi ang usa ka negosyante human kini posila sa duha ka wala maila nga suspetsado, niadtong Hunyo 25 sa may alas onse sa buntag atubangan sa shop niini.

 Ang biktima usa ka Christopher Cuesta, 38 anyos, minyo, nagpuyo sa Catadman-Acasia, Ozamiz City ug tag-iya sa Ozamiz Brake Bonding Service nga nahimutang sa Kaaminio Street sakop sa dakbayan.

 Sibo sa imbestigasyon sa mga sakop sa kapolisan nga ang biktima maoy pag-abot niini sa shop sa dihang kalit nga misulpot ang riding in tandem sa likoran nga bahin ug miposil sa makalima ka higayon ang angkas sa motor siklo. 

Nakaangkon og tulo ka igo pinusilan sa likod nga bahin ang biktima nga maoy hinungdan sa hinanaling kamatayon niini.

 Kalibre .45 nga pistol ang gigamit sa pagposil sa mga suspetsado sibo sa mga basiyo sa bala nga nakita sa dapit nahitabuan. 

Human sa hitabo dali nga misibat ang mga suspetsado sa wala matino nga direksiyon. Sa pagpakighinabi sa mga sakop sa media, gipadayag ni Luisita Cuesta, asawa sa biktima nga wala siyay nahibaloan nga kontra ang iyang bana hinungdan nga blangko pa usab sila sa maong hitabo.

 Samtang sa imbestigasyon sa kapolisan sa Ozamiz, usa sa ilang gituohan nga motibo ang giingong personal nga panagbangi.(NAB)