Rural Transit Bus gitulis sa Ozamiz

TANGUB CITY—PADAYON nga giimbestigahan sa mga sakop sa kapolisan ang nahitabo nga pagtulis sa usa ka de pasaherong Bus nga Rural Transit niadtong Hunyo 25 sa may alas 3:20 ang takna sa kadlawon. Gipadayag ni Clarito Saquin, Terminal Incharge sa sa Rural Transit Mindanao, Incorporated (RTMI) sa Ozamiz City nga mga alas tress sa kaadlawon nga migikan ang nasangpit nga bus sa Integrated Bus and Jeepney Terminal (IBJT) padulong sa Pagadian City. Gidugang ni Saquin nga adunay napulo ka mga pasahero ang sakay sa maong depasaherong sakyanan nga nagdala sa body number 9132 apan pagdangat niini sa Barangay Pulot, Ozamiz City mimando ang usa sa duha ka mga suspetsado ngadto sa driver sa pagpahunong dungan sa pagtion sa gituohang kalibre .45 nga pistol ug sa pagpahibalo nga kadto usa ka tulis. Nakuha sa mga suspetsado gikan sa mga pasahero ang personal nga mga gamit niini sama sa pitaka, cellular phone, kuwarta ug relo. Gani sa taho adunay duha ka mga babaye ang nakuhaan og P10,000 ug ang collection sa conductor nga moabot sa P2,000. Ang maong Bus ang gimaneho sa usa ka Mal Depena u gang conductor niini naila sa bansagon nga Banquilar. Gikuha usab sa mga suspetsado ang pitaka sa inspector nga si Romeo Marquez, 43 anyos ug lumulopyo sa Naragan, Tigbao, Zamboanga del Sur. Nasayran nga ang usa sa mga suspetsado sakay na nga daan sa Bus nga nanukad sa IBJT-Ozamiz u gang laing suspetsado mipara sa Maya Store sa circumferential road sa Ozamiz. Human sa hitabo, wala na masayri asa mipahilayo ang duha ka mga suspetsado. Samtang dali usab nga gideritso sa driver ang sakyanan sa Tangub City police station aron nga ipahibalo ang nasangpit nga insedente.(NAB)