Gov. Ramiro no comment sa audit sa Ozamiz

OZAMIZ CITY--NO comment si Misamis Occidental Governor Herminia ‘Hermie’ Ramiro sa gipahigayon ug sa resulta sa special audit sa Commission on Audit sa Ozamiz City.

Hinuon iyang giingon nga aduna may hinungtungdan nga mga ahensiya o buhatan nga maoy nag-handle niini.

Nasayran nga sibo sa gipadayag sa COA namatikdan nga adunay giingong ‘grave irregularities’ sa mga financial transactions sa Ozamiz City.

Diin gipadayag usab ni Ozamiz City mayor Nova Princess Parojinog-Echavez nga sa iyang administrasyon wala siyay gihimo nga supak sa balaod diin intact ang kuwarta ug mga procedural lapses lamang ang namatikdan sa COA.

Kahimnumduman nga sa taho nga gipagawas sa COA Northern Mindanao nga lakip sa ilang nakita mao ang pakyas nga pag-remit sa City government sa bahin sa 51 ka mga barangay sa ilang real property taxes ug community tax certificates gikan sa bulan sa Hulyo ngadto sa Septiyembre 2010.

Ang maong kantidad miabot kini sa P40 M. Sumala pa sa COA nga kini nakalapas sa provisions sa Republic Act 7160 o local government code.
Sa migawas nga balita sa Daily Inquirer miabot sa P182 M ang overdraft sa Ozamiz sa bulan sa Hunyo ngadto sa Septiyembre 2010.

Adunay P8 M nga premiums sa mga empleyado lakip na ang insurance coverage nga wala usab ma-remit.

Diin lakip na niini ang kalit nga pagburot sa suholan ngadto sa P66 M gikan sa P29.4 M.

Namatikdan usab nga ang suhulan sa bulan sa Hunyo, Hulyo ug Septiyembre 2010 nga miabot sa P13.4 M nahatag nga walay hustong documentation.

Kahinumduman nga una na nga gitubag usab kini ni Ozamiz City Accountant Cynthia Ferraren nga kini gumikan lamang saw ala magtakdo nga accounting procedures.(NEPTALIE BATOLENIO)