Ramiro: 95% sa renovation sa MOAP natapos na

SINACABAN, MisOc--Gilauman nga hingpit nga matapos ang pag-renovate sa Misamis Occidental Aqua Marine Park (MOAP) sa katapusang semana niining bulan sa Abril.

Gipadayag ni Misamis Occidental governor Herminia Ramiro nga tinguha nga matapos ang pagtrabaho sa MOAP ilabina nga niining panahon sa summer dagsaan sa daghang mga local ug foreign tourist ang lalawigan.

Gidugang ni Ramiro nga 90 ngadto sa 95 porsiento ang natapos sa pagtrabaho niini nga naglangkob sa walk way ug sa restaurant niini.

Gipasabot ni Ramiro nga ang mokapin sa P6 M ang gi-budget alang sa pagtrabaho sa restaurant sa MOAP ug sa walkway moabot sa P12 M ang gigahin nga salapi.

Nasayran nga sementado na ang walk way ug dili sama kaniadto nga kawayan lamang nga halos kada tuig mag-ilis apan karon gitawag kini sa gobernador nga maintenance free.
Bisan pa man nga dili pa fully operational ang MOAP apan aduna nay daghang mga bisita ang miduaw niini.

Tinguha usab karon sa MOAP nga makakuha og maayong modala sa restaurant ilabina nga ang serbisyohan niini kadtong mga local ug foreign tourists.

Saysay ni Ramiro nga ilang paningkamutan nga daghan pang attraction ang ipahiluna sa MOAP aron labing dugukon sa katawhan.

Kahinumduman nga temporaryo nga gisira ang MOAP gumikan sa gihimo nga renovation. (NEPTALIE BATOLENIO)