Illegal nga mga mananagat nadakpan sa PNP-Maritime

OZAMIZ CITY--ISIP kabahin sa gihingusgan nga kampanya batok sa pagsumpo sa illegal nga panagat sa Philippine National Police-Phillipine Maritime Command (PNP-MariCom) sa Ozamiz City, nasikop ang duha ka mga illegal nga mananagat.

Ang duha ka mga nadakpan mao sila si Allan Barera anaa sa legal nga pangidaron ug usa ka naila sa ngalan nga ‘Cristian’, usa ka 16 anyos nga minor de edad ug pulos nagpuyo sa Catadman, Ozamiz City.

Nadakpan ang maong mga suspetsado atol sa gipahigayon nga joint seaborne operation niadtong Nobiyembre 10 sa may alas nuwebe sa buntag.

Gipadayag ni police senior inspector Nolasco Cabasag Ratilla, PNP-MariCom chief nga nadakpan ang duha sa dihang nanagat kini gamit ang motorized push trawl kon ‘sud-sud’ sa kadagatan sa Cotta Area.

Gidala ang duha ka suspetsado sa buhatan sa PNP-MariCom alang sa dokumentasyon ug pagkhuman gibuhian samtang giduso ang kaso niini sa Ozamiz City Fisheries Division.(NEPTALIE BATOLENIO)