Clarin awardee og ‘good housekeeping seal’

CLARIN, Misamis Occidental---Nagbunga ang paningkamot sa local government unit (LGU) niining lungsod human nga nahimong awardee kini sa gitawag nga “good housekeeping seal”.

Gipadayag ni Clarin municipal mayor David Navarro nga nakuha sa iyang lungsod ang nasangpit nga award gumikan sa maayong gipakita nga pamaagi sa pagdala sa renda sa pangagamhanan lakip na ang pagpasibaw sa transparency ug accountability.
Gumikan niini gipasalamatan usab ni Navarro ang tanan nga mga lumilihok sa iyang administrasyon lakip na ang katawhan nga nagkahiusa aron makab-ot ang nasnagpit nga award.

Nasayran nga usa ang lungsod sa Clarin sa 15 ka mga LGU nga nakadawat sa maong award.

Ang 15 ka mga awardee naglangkob usab sa: Anilao, Iloilo; Balete, Aklan; Balilihan, Bohol; Catigbian, Bohol; Clarin, Misamis Occidental; Damulog, Bukidnon; Datu Paglas, Maguindanao Leon B. Postigo, Zamboanga del Norte; Mobo, Masbate; Naawan, Misamis Oriental Pitogo, Quezon; San Agustin, Surigao del Sur; Santol, La Union; Sto. Domingo, Albay ug Tampilisan, Zamboanga del Norte.

Ang mga awardee nasakop sa fourth ngadto sa sixth class municipality.
Sa iyang kabahin, gipadayag ni Interior and Local Government Secretary Jesse Robredo ang mga awardee nakadawat og tag P2 M.

Gipili ang mga awardee gumikan sa ilang maayong performance sa panggobiyerno, ilabina sa planning, fiscal management, transparency ug accountability, ug performance monitoring.

Saysay ni Robredo nga ang mga nakadawat og award walay dili maayong taho gikan sa Commission on Audit, nga nagpasabot nga sila nakakompleto sa tanan nga mga rekisitos sa COA.

Ang mga nakadawat sa award sa seal of good housekeeping kuwalipikado alang sa Performance Challenge Fund (PCF),diin makakuha og pundo alang sa kalambuan sa maong mga lungsod.(NEPTALIE BATOLENIO)