16 ka barangay sa Ozamiz gitutukan sa PNP sa umaabot nga piniliay

OZAMIZ CITY--MOABOT sa 16 sa 51 ka mga barangay sa Ozamiz ang gitutukan karon sa mga sakop sa Philippine National Police (PNP) nga gitawag og critical areas sa umaabot nga synchronized barangay ug Sangguniang Kabataan elections karong Oktobre 25.

Gipadayag ni Police superintendent Gervacio Balmaceda, Jr., Ozamiz Chief of police nga siyam ka barangay ang gitawag nga critical ug pito niini ang gitawag og ‘less critical’ barangays sa dakbayan.

Inay nga areas of concerns ang terminolohiya nga gigamit sa PNP mao ang critical ug less critical sa mga dapit nga adunay namatikdan nga adunay giingong intense rivalry sa mga kandidato.

Saysay ni Balmaceda nga siyam ka mga critical barangays naglangkob sa Barangays Gala, Montol, Capucao P, Balintawak, Guimad, Guinggona, Mentering, Sangay Daku ug Trigos.

Samtang ang gitawag nga less critical naglangkob sa Kinuman Sur, Kinuman Norte, Malaubang, Cavinte, Manaka, Lam-an ug Labo.

Dugang ni Balmaceda nga ang pag-indentify sa maong mga dapit sibo usab sa ilang nahipos nga intelligence report ilabina may kalambigitan sa kaiinit sa politika.
Saysay ni Balmaceda nga sibo sa basehan sa PNP: adunay kainit sa politika, adunay namatikdan nga partisan armed groups (PAGS), presensiya sa mga rebelde o adunay kasinatian sa mga election related incidents.

Gidugang ni Balmaceda nga bisan ang mga barangay nga wala sa ilang listahan dili usab nila kini ibaliwala tungod kay ila usab kini nga tutukan nga magpabilin ang dagan sa kahusay ug kalinaw sa umaabot nga piniliay.

Kahinumduman nga una na nga gipadayag sa hepe nga hugtanon nila nga gipatuman ang gun ban sa Ozamiz.(NEPTALIE BATOLENIO)