Ocampos bukas sa dayalogo ngadto ni Echavez

OZAMIZ CITY--BUKAS ang kongresista sa ikaduhang distrito sa Misamis Occidental sa usa ka dayalogo sa hepe ehekutibo sa Ozamiz City ilabina may kalambigitan sa pagpalig-on sa dagan sa kahusay ug kalinaw.

Gipadayag ni Representative Loreto Leo Ocampos nga bukas siya alang sa pagpakigsulti ni Ozamiz City Mayor Nova Princess Parojinog-Echavez ilabina sa pagsulbad sa problema sa siyudad may kalambigitan sa dagan sa kahusay ug kalinaw.

Saysay sa kongresista nga kon dawaton lamang ni Echavez nga adunay problema ang dakbayag hayan mahatagan kini og kasulbaran.

Dugang niini nga andam siya nga makig-alayon sa mayor basta nga ipakita niini ang kasinsiro sa pagsulbad sa krimen sa Ozamiz.

Gipasabot ni Ocampos nga usa sa principal function ni Echavez isip mayor mao ang pagpatunhay sa peace and order.

Gihagit ni Ocampos si Echavez nga kon sinsiro kini sa kampanya sa pagsulbad sa mga nahitabong krimen manguna kini nga masikop ang mga tawo nga nagpakaulaw sa Ozamiz, ilabina kadtong mga nalambigit sa robbery sa kaulohan.

"Siyay manguna sa pagdakop ani, dayon iyang ipadala ngadto sa Camp Crame," padayag ni Ocampos.

Gidugang sa pagsugilon ni Ocampos nga dili maayo nga tabunan ang unsa man nga mga hitabo aron nga masulbad kini.