Karnaper sa Ozamiz ug Tangub miabot sa Bonifacio

BONIFACIO,MisOc—Managsamang gipadayag sa Philippine National Police (PNP) ug sa hepe ehekutibo niining lungsod nga naggikan sa Ozamiz ug Tagub City ang mga suspetsado sa carnap sa nasangpit nga dapit.

Gipadayag ni Bonifacio,Misamis Occidental municipal mayor Samson Dumanjug nga sa mga nahitabo nga kaso sa pagpang-carnap sa ilang lungsod kadaghanan sa mga suspetsado gikan sa Ozamiz ug Tangub City.

Gituohan ni Dumanjug nga tungod kay galusotlusot ang ilang dalan sa mga bukirang bahin padulong sa sentro hinungdan nga dali ra nga makaagi ang mga karnaper ug makasibat ilabina nga kon makakawat na og motor siklo.

“Gumikan tingali kay nindot na ang atong dalan mao nga dali ra nga makalusot ang mga kanaper,” dugang ni Dumanjug.

Gisuportahan usab ni Police senior inspector Nelson Sistoso, chief of police sa maong dapit ang pahayag ni Dumanjug nga naggikan sa Ozamiz ug Tangub City ang mga suspetsado sa kaso sa karnap sa maong dapit.

Iyang gidugang nga aduna silay mga suspetsado naggikan sa Barangay Tabid, Ozamiz City ug Barangay Tugas, Tangub City sibo usab sa mga nahitabo nga carnap sa maong lungsod.

Gumikan niini gihingusgan karon sa kapolisan sa Bonifacio ang pagpahigayon og checkpoint aron nga dili kahatagan og kahigayunan ang mga karnaper nga maksulod sa nasangpit nga lungsod.(NEPTALIE BATOLENIO)