Dumanjug naalarma sa nahitabong mga krimen

BONIFACIO,MisOc—Naalarma karon ang mayor niining lungsod sa sunod-sunod nga mga nahitabong krimen sama sa mga kaso sa pagposil, carnap ug usa ka kaso sa pagpanglugos.

Gipadayag ni Mayor Samson Dumanjug nga taliwala sa maong mga panghitabo wala magpasabot nga gubot ang ilang dapit hinuon kontrolado pa gihapon sa mga sakop sa kapolisan ang kinatibuk-an nga dagan sa kahuay ug kalinaw sa maong dapit.

Nasayran nga una niini usa ka kaso sa pagpanglugos ang nahitabo diin gipatay pa ang biktima.
Ang biktima usa ka Mary Jane Tillo Luna, 16 anyos ang pangidaron, fourth year high school sa Diwat National High School sa nasangpit nga lungsod.

Nakaplagan na lamang ang biktima nga wala nay kinabuhi sa awaaw nga dapit sa Purok 2, Barangay Tusik, Bonifacio, Misamis Occidental.

Sa imbestigasyon sa kapolisan, gituohan nga gilugos ang biktima ug pagkahuman gidakdakan og bato ang ulo nga maoy gituohang hinungdan sa iyang hinanaling kamatayon.

Una niini naalarma ang ginikanan sa biktima tungod kay sa dihang mieskuyla kini niadtong Septiyembre 3 wala kini makapauli. Nakaplagan na lamang ang patay nga lawas sa biktima pagka-Septiyembre 4 alas otso sa buntag upat ka kilometro ang gilay-on gikan sa eskuylahan.
Gituohan nga giatangan ang biktima sa suspetsado samtang padulong kini sa tunghaan.

Laing panghitabo, niadtong Septiyembre 4 sa may alas kuwatro sa hapon sa ka kaso sa pagpamosil ang nahitabo.

Ang mga biktima nga managsmang nakabsan sa kinabuhi mao sila si Joqim Ostia y Hisuler, 33 anyos, minyo usa ka mag-uuma ug usa ka Walter Redoblado, 34 anyos, ulitawo ug managsmang nagpuyo sa Sitio Riverside, Migpange, Bonifacio, Misamis Occidental.

Nasayran nga sakay ang mga biktima sa multicab apan kalit kini nga gibabagan sa mga suspetsado nga nakasakay sa usa ka motor single ug gipamosil ang mga biktima. Nakaangkon kini og nagkadaiyang igo pinusilan sa ilang ulo hinungdan nga hikabsan sa kinabuhi.

Ang mga suspetsado naila nga sila si Atoy Gudilos, 35 anyos ang pangidaron ug usa ka Ian Torillo, 34 anyos nga giingong nagpuyo ra usab sa maong lungsod. Gipangita pa usab sa kapolisan ang mga suspetsado.

Lima ka basiyo sa kalibre .45 ang nakuha sa dapit nahitabuan.

Samtang sa pagka-alas otso sa gabi usa ka kaso sa pagpamosil na usab ang nahitabo.
Ang biktima usa ka David Frasco, 40 anyos ang pangidaron nga nagpuyo sa Barangay Tusik.
Ang suspetsado misulod sa panimalay agi sa kusina dala ang wala matino nga kalibre sa armas.
Giposil ang biktima sa makadaghang higayon hinungdan nga nakaangkon kini og samad pinusilan sa iyang walang abaga ug sa dughan hinungdan sa iyang kamatayon.

Ang maong mga kaso ang padayon pa nga giimbestigahan sa kapolisan.

Bisan pa man sa maong hitabo, gipaniguro usab ni Mayor Dumanjug nga wala kini makapatandog sa kinatibuk-an nga dagan sa kahusay ug kalinaw sa maong lungsod.

Gani aduna nay mga lakang nga gihimo anng kapolisan sa maong lungsod aron masikop ang mga suspetsado sa maong mga krimen.(NEPTALIE BATOLENIO)