Taskforce Lion, makatabang sa kapolisan--Quenery

OROQUIETA CITY--GUMIKAN sa suliran sa kakulang sa kapolisan, gipadayag sa Philippine National Police (PNP) Misamis Occidental nga dako og ikatabang kanila ang presisnsiya sa Taskforce Lion sa lalawigan ilabina sa Ozamiz City.

Gipadayag ni Police senior superintendent Robert Quenery, PNP provincial director nga bisan unsa nga presinsiya sa awtoridad o mga friendly forces dako kini og ikaabag sa ilang puwersiya.
Dugang ni Quenery nga ang presinsiya sa Taskforce Lion dako kini og tabang kanila ilabina sa hilisgutanan nga police visibility.

Saysay ni Quenery nga bisan nga ang primary concern sa Taskforce Lion mao ang pagbungkag sa giingong mga armadong grupo apan makatabang kini sa pagpatunhay sa kalinaw ug kahusay sa lalawigan.

Sa iyang kabahin, una na nga gipadayag ni Ozamiz City mayor Nova Princess Parojinog-Echavez nga dako og ikatabang sa PNP-Ozamiz ang Taskforce Lion ilabina nga taud-taud na nga naghangyo ang siyudad nga madungagan ang puwersa sa kapolisan sa siyudad.(NEPTALIE BATOLENIO)