Spokesperson ni Ocampos sa nakalabay nga election nabiktima sa ‘text hoax’

MIBATI og kabalaka ang mga higala ug kaparentihan sa usa ka kanhi tigpamaba sa usa ka politiko niadtong nakalabay nga piniliay human nga mokatag  ang mga text messages nga giposil kini patay duol sa usa ka food chain sa Ozamiz.

Mikatag ang mga text messages nga giposil-patay si Marson Ramayrat, ang spokesperson ni out going Misamis Occidental 2^nd District Representative Loreto Leo Ocampos.

 

Gumikan sa maong text messages daghan ang mga higala, kabanay ug mga kaila ang nakurat ug nabalaka niini.

Sa gihimong pakisusi sa mga sakop sa media, nahitabi si Ramayrat ug mipadayag nga siya mismo nakadawat sa daghan kaayong pangutana may labot sa tinuod niya nga kahimtang.

Gisaysay ni Ramayrat nga walay kamatuoran ang maoy text messages ug dako siyang buhi.

Walay gituohan si Ramayrat kinsa ang mipakatag sa maong text messages  ug posible nga kahimuan lamang kini sa mga tawo nga walay mahimo ug walay lingaw sa ilang kinabuhi.

Gidugang niini nga tungod sa maong text messages ang iyang mga kabanay mibati na hinuon og kabalaka sa iyang seguridad.

Tungod niini daghan ang mitambag kaniya nga dili mokompiyansa may labot sa maong kahimtang.

Bisan tuod og walay kamatuoran ang maong mga text messages apan wala kini ibaliwala ni Ramayrat.

Hinuon, nanawagan na lamang siya kinsa man ang mihimo sa maong bakak nga mga text messages nga mahimong responsabli sa paggamit sa cellular phone.