Balmaceda nagtuo nga sulbad sa krimen ang pagsikop sa mga motor nga walay hustong papeles

OZAMIZ CITY--SA tinguha nga mahatagan og kasulbaran ang nagkadaiyang krimen sa Ozamiz City, hinungdan nga gipatuman sa kapolisan ang pagsikop sa mga motor single nga walay hustong mga papeles ug ingon man walay mga plate number.

Gipadayag ni Superintendent Gervacio Balmaceda, Jr., chief of police sa Ozamiz nga gumikan sa pagtaas sa kaso sa caranpping sa Ozamiz hinungdan nga gipatuman niya ang pagsikop sa mga motor single nga walay mga hustong papeles.

Dako ang pagtuo ni Balmaceda nga masulbad ang ubang mga krimen ilabina nga kasagaran nga sakyanan nga gigamit sa mga suspetsado mga kolorom nga motor single.

Hinuon, giangkon usab ni Balmaceda nga nakadawat siya og pipila ka mga reklamo sa ilang pagpatuman ilabina nga bisan wala ang tag-iya sa motor nga nakaparada ug kon ilang makita nga wala kini hustong papeles ila gayud kini nga dal-on sa kuwerpo sa kapolisan.

Iya lamang gihangyo kadtong mga nakapuwerhisyo nga mosabot lamang sa ilang trabaho tungod kay alang usab kini sa kalinaw sa dakbayan ug kasulbaran sa nagkadaiyang kremin.

Kahinumduman nga unang mipadayag sa iyang reklamo ang usa ka magtutudlo sa Misamis University (MU) nga si Robert Castro samtang ang iyang motor single nakaparada sa compound sa nasangpit nga tulonghaan gidala kini sa kapolisan.

Nasayran nga ang gibasihan sa hepe sa pagdala sa maong motor taliwala sa kompelto kini og papeles mao ang sticker niini nga 2010. Bisan pa man sa pahayag ni Castro nga tinuod nga 2010 ang iyang sticker tungod kay sa bulan sa Agosto pa kini mo-expire apan gidala gihapon kini sa kapolisan.

Hinuon na release ang maong motor apana nakabalda kini sa ubang gimbuhaton ni Castro.
Sa nakuhang impormasyon, wala nay plano si Castro nga mopasaka og kaso sa gihimo sa kapolisan.(NEPTALIE BATOLENIO)