Aguirre mitubag; Saquin dili kombisido

OZAMIZ CITY--DAAN na nga gidahuman sa president sa Ozamiz City National High School General Parents Teachers Association (OCNHS GPTA) School year 2010-2011 nga makakuha siya og dili maayong resulta sa hukom sa Division PTA Affairs Committee.
Gikuwestiyon ni OCNHS president Darwin Aguirre ang ‘intention’ sa mga sakop sa Division PTA Affairs Committee.

Iyang gipadayag nga si Dr. Rosa Lantaca ang Chairperson ug OIC Schools Division Superintendent wala mo-aksiyon sa iyang mga isyu batok ni OCNHS principal Jovita ‘Lingling’ Saquin diin gi-tolerate lamang kini. Lakip nga iyang gikuwestiyon mao si Fernando Sumondong, division PTA coordinator nga sumala pa niya empleyado sa division office hinungdan nga ilalom gihapon sa gahom ni Lantaca.

Gidugang ni Aguirre nga si Nenith B. Mehoy, administrative officer makadaghan na niya nga naengkuwentro og iyang gitawag nga dili matinud-anon. Natingala usab si Aguirre mahitungod ni Celestino Filipino, division PESFA president nga nahimong presidente sa pampumbikong tulonghaan nga dili kini principal.

Sibo sa DepEd Order number 54 series of 2009, nasayran nga ang Division Affairs Committee maglangkob sa Schools Division Superintendent, isip chairman ug ang mga miyembro niini naglangkob sa Assistant Schools Division Superintendent, Division Administrative Officer, Division Education Supervisor (In-Charge of PTA), Division PESPA President, president sa Division Federation sa PTA ug Presidente sa Division Federation sa SSG.

Gipadayag ni Aguirre nga walay kamatuoran nga wala siya makasumiter sa gipangayo nga Mid-School Year Financial Statement gani aduna siyay kamatuoran nga gi-receive kini sa buhatan ni Saquin.
Apan sa kabahin ni Saquin iyang gipadayag nga walay sila makadawat tungod kay walay giduso nga pormal nga mga dokumento sa ilang buhatan hinungdan nga mipagawas og hukom ang Division PTA Affairs Committee human sa pahimangno ug lugway ngadto sa buhatan ni Aguirre.

Ang gibasehan sa maong sulat-hukom ang DepEd order No. 54, s. 2009 nga nagkanayon: “…The PTA shall also submit to the School Head not later than November 30, duly audited and signed by members of the PTA’s audit committee. Failure to submit such financial statement report shall be a ground for the cancellation of the recognition of the PTA by the Division PTA Affairs Committee upon the recommendation of the School Head…”

Nasayran nga sa narrative report sa Division PTA Affairs Committee milutaw nga giangkon ni Gilda Luna, OCNHS GPTA treasurer nga adunay mga kuwarta nga iyang nagamit sa personal nga katuyuan.

Sa nalatid sa DepEd Order 54, nagkanayon nga ang tanan nga mga opisyal sa PTA ug mga sakop sa Board of Directors gidid-an sa pagkuha og suweldo, honorarium o ubang porma sa compensation gikan sa pundo sa PTA.

Gidugang usab sa pagsugilon ni Aguirre nga mahimo nga dili mopailalom sa standard auditing procedures ang GPTA.

Apan sibo sa DepEd order 54, nagkanayon nga ang tanan nga disbursement sa mga pundo o kuwarta kinahanglan nga mahiuyon sa gitawag nga generally accepted accounting and audtiting rules and regulations, kinahanglan nga adunay hustong resolutions ug ang mga cash advances kinahanglan nga adunay valid liquidation.

Nasayran nga sa gipagawas nga report ni Jaime Busaco, Sr., OCNHS GPTA auditor, gipadayag niini nga wala masunod ang operational standard sa pagpagawas sa kuwarta sa nasangpit nga kahugpungan. Dugang niini nga adunay mga stubs sa resibo ang nangawala apan nalakip kini sa audit niadtong Desiyembre 2010.

Saysay niini nga adunay moabot sa P38,095.000 ang nahanaw nga 12% sa nakolekta nga P313,386.25 o 14% sibo sa nadiposito nga P275, 291.25.

Dugang sa pagsugilon ni Busaco nga dakong problema ang liquidation sa disbursement tungod kay walay disbursement report ang na-compile gawas lamang sa mga photocopies sa mga resibo ang giduso.

Sibo sa mga photocopies milatid kini og P44,934.00 sukwahi sa kinatibuk-an nga disbursement nga P228,423.15. (NEPTALIE BATOLENIO)