Veterinary office padayon sa outreach program

OZAMIZ CITY--GIPADAYON sa Ozamiz City veterinary office ang ilang outreach program uban sa posibilidad nga kini mapalapdan pinaagi sa tabang sa pipila ka mga Non Governmental Organizations (NGO’s) nga aktibo nga nagpaluyo sa mga programa sa nasangpit nga buhatan.

Pinaagi sa kasayuran nga gipadangat ni Juvy Canumay sa buhatan sa mayor,
gipadayag ni Dr. Evelyn Sunico, Ozamiz city veterinarian nga padayon ang pag-purga sa mga hayop, pag-kapon ug ilabina ang pag-bakuna sa mga iro nga mao usab ang usa sa gihingusgan sa nasangpit nga buhatan.

Nasayran nga sa tuig 2010 moabot sa 1, 370 ka mga iro ang nabakunahan, ilalom sa sa rabies eradication sa maong ug sa local nga pangagamhanan.

Gidugang ni Sunico nga ang pundo alang sa rabies eradication karong tuiga ihurot kini og palit sa rabies vaccine alang sa pagkab-ot sa target sa maong programa karong tuiga.

Sa pikas nga bahin, usa usab nga gihingusgan sa veterinary office ang ilang livelihood program kansang multiplier farm gikuha ang dispersal sa kabaranggayan.

Ang unang dispersal sa kanding ug manok niadtong tuig 2005 ug midaghan kini ug mao ra usab ang gikuhaan og liwat diin giapod-apod sa mga nagsunod nga mga katuigan ang mga produkto niini.

Kini naglangkob sa artificial insemination sa kanding, baboy ug baka.

Atol sa gipahigayon nga kalihukan nga gitawag og barangay Nova, nasayran nga napahimuslan na usab kini sa 35 ka mga barangay.

Ang barangay Nova, programa ni Ozamiz City mayor Nova Princess Parojinog-Echavez diin gidala niini ngadto sa barangay ang mga libreng serbisyong pangkatawhan diha sa City hall padulong didto sa tugkaran sa mga kabaranggayan.

Kahinumduman nga ang Ozamiz City Veterinary office nakadawat kini og incentive sa buhatan sa mayor gumiukan sa gipakitang maayong serbisyo niini.(NEPTALIE BATOLENIO)