Florida naalarma sa crime rate sa MisOc

OROQUIETA CITY--NAALARMA si Misamis Occidental 2nd District Boardmember Edwin Florida sa crime rate sa lalawigan human nga namatikdan nga hilabihan kini ka taas sibo sa iyang pagkuha sa mga nagkadaiyang panghitabo sa mga police stations.
Si Florida chairman sa Committee on Blue Ribbon and Good Governance ug ingon man minority floor leader sa Sangguniang Panglalawigan (SP).

Gipadayag ni Florida nga iyang gipa-research ang crime rate sa Philippine National Police (PNP) stations apan nahingangha siya sa kataas sa krimen hinungdan nga iyang gusto nga maimbestigahan kini ug posible nga makapanday og balaod may kalambigitan niini.

Dugang ni Florida nga daw dili siya makatuo sa maong gitas-on sa mga nahitabong krimen, hinuon wala niya gibutyag ang kinatibuk-an nga gidaghanon apan iya kining tutukan ilabina nga labihan ang pagsaka niini.

Sa iyang kabahin gipadayag ni 1st District Boardmember Inocencio Pagalaran, Jr., chiarman sa committee on Budget, Finance and Appropriations ug sa committee on police, peace and order, fire services, jail management and disaster preparedness nga kinahanglan nga matutukan usab ang maong taho nga misaka ang crimerates.
Saysay niini nga kinahanglan nga mahatagan og saktong suporta ug budget ang gitawag og ‘five pillars’ nga mao ang Community, The Law Enforcement, The Prosecution Service, The Courts, ug ang Correctional Institution.

Kahinumduman nga gumikan sa pagsaka sa krimen, una na nga gisaysay usab ni Misamis Occidental 2nd District Congressman Loreto Leo Ocampos nga kadaghanan niini gumikan sa kahimuan sa armadong grupo hinungdan nga gipadala ang ‘Taskforce Lion’ nga gitahasan sa pagbungkag sa giingong ‘partisan armed groups’ (PAGS) sa lalawigan.(NEPTALIE BATOLENIO)