Committee on Infra sa RDC sa rehiyon-10 nagpahigayon sa labing unang konsultasyon sa MTDP

OZAMIZ CITY--GIPAHIGAYON sa Committee on infrastructure sa Regional Development Council (RDC) 10 ang labing unang konsultasyon sa Medium Term Development Plan (MTDP) niadtong Enero 6, sa Grand Caprice Hotel, sa Cagayan de Oro City.

Mga ahensiya nga may kalabutan sa infra sama sa Department of Education (DepEd), Department of public Works and Higwahys (DPWH), National Irrigation Administration (NIA), Department of Transportation and Communication (DOTC) , Department of Health (DOH) ug uban pang mga ahensiya sa rehiyon , ang nakig-uban sa gihimong konsultasyon.

Tumong sa maong konsultasyon nga mamugna ang mga sumbanan sa pagpadali sa mga infrastructure development sa rehiyon, alang sa rekomendasyon sa pangkinatibuk-ang pamaagi nga sagupon alang sa Medium Term Development Plan alang sa tuig 2011 ngadto na sa 2016.

Si Ozamiz City Mayor Nova Princess Parojinog-Echavez isip chairman sa committee on infrastructure, aktibo nga nakigdugtong sa mga nahisgutang ahensiya, alang sa mas lig-on nga lakang pagsiguro nga ang mga dagkong proyekto sa infra sa region-10 mapagawas ug mapondohan, particular ang proyekto sa ozamiz, sama sa Ozamiz City coastal bypast road, airport road , airport expansion, ug ang Ozamiz City Clarin Interior Bypass Link.

Nakig-tagbo usab sa mga chairman sa nagkadaiyang komitiba sa RDC-10 si National Economic Development Authority (NEDA) director General and economic planning secretary Cayetano Paderanga Jr..

Sa ilang panagtabo si Mayor Nova napadangat ngadto kang kalihim Paderanga sa mga concern sa Ozamiz, nga may kalabutan ang pagpalambo sa syudad.
Swerte ang Ozamiz nga si Mayor Nova ang natudlo nga chairman sa committee on infra sa RDC-10 sanglit dinhi pandayon ang mga programa alang sa matag rehiyon ug probensiya, una ipaabot ngadto sa kongreso, senado ug ngadto sa Malacanang.(NEPTALIE BATOLENIO)