Pagpananom og Balite gipaasdang sa MisOc

PADAYON karon ang Concerned Advocate Saving Terrestrial Linking Natural-Coastal Eco-System (COASTLINE INC.) sa pagpalapnag sa kaayohan sa pagpananom og Banyan Tree kon Balite.


Gipadayag ni Dr. Nelson ‘Jongjong’ Cuaresma, director sa Coastline Incorporated Research and Development on Coastal and Watershed Ecosystem Studies nga padayon sila karon nga misulod sa nagkadaiyang barangay sa lalawigan sa Misamis Occidenal aron mapasabot ug mapasibaw ang kaayohan nga makuha ilabina sa kinaiyahan sa pagtanom sa Banyan Tree.


Gisaysay ni Cuaresma nga ang Banyan Tree adunay 800 ka klase nga makita sa Pilipinas diin dako kini og ikatabang sa pagpahiuli sa nagusbat nga kinaiyahan.


Gidugang ni Cuaresma nga daghang kaayohan ilabina sa kinaiyahan ang mapahimuslan sa katawhan sa pagpananaom og Balite.


Sa usa ka scientific study nasayran nga ang Banyan Tree labing maayo nga itanom ilabina sa siyudad alang sa pagpasig-uli sa unbalanced ecosystem, promote biodiversity ug sa pagpakigbatok sa nasinating global warming.


Gipasibaw usab ni Cuaresma nga ang Banyan Tree o Balite una na nga girekomenda sa National Aeronautics Space Administration (NASA) aron masulbad ang Global warming ug ingon man usab mahimo kini usa sa mga tourist attractions nga mahimo usab nga tinubdan sa dugang kinitaan sa gobiyerno.


Dugang kayohan nga makuha mao nga makatabang nga masalbar ang nagakagusbat nga mga kasapaan ug kasubaan, makapugong sa pagdahili sa mga yuta o soil erosions, makapugong sa mga posibleng mahitabong landslide, pagbaha ug aron pagpahilayo sa katawhan sa usa ka katalagman.

Nasayran nga ang ang Ozamiz City adunanay ordinansa nga nagdawat sa Banyan Tree diin nagpasibaw sa mga paagi sa pagprotehir ug preservation ug pag-imposar og penalty sa makalapas niini.


Dili pa lamang dugay ang nasangpit nga ordinansa ang gi-adopt usab sa Philippine Councilors League (PCL) Misamis Occidental chapter atol sa gipahigayon nga panagtagbo niini. (NEPTALIE BATOLENIO)