Ozamiz City PNP aduna nay bag-ong building

OZAMIZ CITY--HAYAN adunay nay kaugalingon nga building ang Philippine National Police (PNP) Ozamiz City kon hingpit na nga masugdan ang pagtukod sa ilang buhatan.
Kini ang hiniusang pahayag sa mga sakop sa kapolisan nga misaksi sa gipahigayon nga ground breaking ceremony, Nobiyembre 25 sa luna niiini luyo nga bahin sa Ozamiz City hall.

Ang ground breaking ceremony gipangunahan ni Department of Interior and Local Government (DILG) secretary Jesse Robredo, Ozamiz City mayor Nova Princess Parojinog-Echavez, sakop sa Sangguniang Panglunsod sa pagpanguna ni Ozamiz City-vice mayor Rolando Romero, mga sakop sa PNP ug mga sakop sa Fraternal order of Eagles diin si Robredo miyembro usab.

Sa iyang kabahin, gipadayag ni Ozamiz City engineer Romeo Cabrera nga taud-taud na ang hangyo sa PNP ngadto sa local nga pangagamhanan sa Ozamiz sa pag-donate og lote alang sa ilang plano nga tukuran sa ilang kaugalingon nga building.
Saysay ni Cabrera nga usa sa tulo ka klase sa luna sa yuta ang gipangayo sa kapolisan.

Dugang sa city engineer nga ang type A mao nga nagkinahanglan og 1000 square meters, type B 600 square meters ug ang type C 400 sq.meter.
Nasayran nga ang type C ang gihatag sa LGU Ozamiz alang sa pagatukoran sa ilang bag-o nga building.

Ang building sa PNP Ozamiz nga pagatukuron adunay sukod nga 8 meters X 12 meters, duha ka andana nga adunay roof deck.
Nasayran nga ang building sa PNP adunay kinatibuk-an nga gasto nga P9 M. Naayran nga ang PNP adunay P5 M samtang giingon nga tugbangan usab kini og P5 M sa LGU Ozamiz.

Hinuon, gipaniguro ni Cabrera nga aduna nay nasayran nga P2.5 M ang LGU diin posible nga madungagan pa kini.

Gitinguha nga sa sunod tuig masugdan na ang pagtrabaho sa nasangpit nga building.
Ang kasamtangan nga buhatan sa PNP anaa kini sa Ozamiz City Hall diin dili haom ilabina nga unsa man nga mga kahimuan posible nga makatugaw sa mga trabahante sa city hall.(NEPTALIE BATOLENIO)