Oil depot sa Jimenez gitulis

JIMENEZ,Misamis Occidental—Aduna nay gidudahan nga duha ka grupo ang Philippine National Police (PNP) nga mitulis sa buhatan sa Petron Oil Depot niining lungsod.
Gipadayag ni Police Senior inspector Elias Hampac, chief of police sa Jimenez, Misamis Occidental nga aduna na silay lead sa nahitabo nga tulis sa Oil depot niadtong Nobiyembre 29 sa may alas dose kapin sa kaadlawon.

Saysay ni Hampac nga ang estilo nga gigamit sa mga tulisan sama sa mga tulis nga nahitabo sa kaulohan. Gisaysay sa hepe nga wala makabasi sa lungsod sa Jimenez ang duha ka grupo nga ilang gidudahan apan anaa na ra kini sa lalawigan sa Misamis Occidental.

Gidugang ni Hampac nga sa pagkakaron nakigdugtong na usab sila sa Taskforce Lion sa maong hitabo ilabina nga labing una kini nga maisip nga dakong hitabo sa maong loungsod.

Nasayran nga dose ka mga armadong kalalakin-an nga nagpatuo nga sakop sa bomb squad ang misulod sa Oil depot gumikan sa giingon nga nakadawat kini og taho nga nagpahibalo nga adunay bomba sa sulod sa nasangpit nga planta.

Sibo sa police blotter ug sa pahayag ni Hampac, nga dali nga nanganaog ang mga suspetsado sa gisakyan ninii nga Revo kolor puti nga adunay red plate o plaka nga iya sa gobiyerno.

Sa dihang nakaduol na sa gate ang mga suspetsado nananghid kini sa tulo ka mga guwardiya nga naka-duty nga mosulod apan wala dayon kini pasudla hinungdan nga gipukaw una si Engineer Niel Montecillo, manager sa nasnagpit nga buhatan.

Human nga maestorya ang nagpaila nga sakop sa bomb squad, gipasulod kini sa manager apan paghidangat niini sa ssulod nga bahin gipangtiunan ang tulo ka guwardiya ug ang manager sa armas nga dala sa mga suspetsado.

Gipasulod usab ang sakyanan nga revo sa compound sa depo.

Armado ang mga suspetsado sa Armalite rifle ug kalibre .45 nga pistola.
Gidisarmahan ang tulo ka mga guwardiya ug gigapos kini gamit ang packaging tape dala ang armas nga shotgun, .45 kalibre, 9mm ug .38 kalibre nga revbolver.

Gipasulod sa mga suspetsado ang manager sa iyang buhatan ug pugsanon nga gipabuksan ang vault apan wala kini nakitang salapi gawas lamang sa usa ka libo ka pesos.
Gigapos ang manager nga si Montecillo ug gitaptapan ang mata. Gikuha sa mga suspetsado ang laptop, CPU ug monitor lakip na ang cash money nga P4,000 ug gipanglungkab ang nagkadaiyang buhatan sa depo.

Sa imbestigasyon, nasayran nga Tagalog speaking ang mga suspetsado apan maila nga Cebuano ang sinultihan. Gani usa sa mga guwardiya nakasugilon nga nagbinisya lamang ang mga suspetsado samtang nagkigsabot sa mga kaubang suspetsado.
Gibanabana nga anaa sa pangidaron nga 30 ngadto sa 40 anyos ang pangidaron sa mga suspetsado.

Ang gisul-ob nga suitshirt sa mga suspetsado adunay marka sa atubangan nga bahin nga ‘Bomb sqauad’ ug sa luyo nga bahin adunay marka nga ‘K 9’.
Gawas pa niini adunay duha ka K 9 dogs nga ‘golden retriever’ nga dala ang mga suspetsado.

Human sa hitabo miiskapo ang mga suspetsado sakay sa Revo ug mipahilayo sa wala matino nga dapit.

Bisan tuod nga nasayra nga adunay kolor pula nga plaka ang Revo apan wala makuha ang plate number niini.

Nakasumbong lamang ang mga biktima sa kapolisan human nga malampuson nga natangtang sa usa sa mga guwardiya ang iyang gapos nga masking tape pinaagi sa usa ka ballpen.
Saysay sa hepe sa kapolisan nga aduna na silay mga giandam nga paagi sa posible nga pagsikop sa mga supetsado.(NEPTALIE BATOLENIO)