Ocampos nahimong presidente sa Mindanao representative

NAPILI nga presidente sa Mindanao Congressmen o Mindanao bloc si Misamis Occidendal 2nd district representative Loreto Leo Ocampos.

Gipadayag ni Ocampos nga wala siya magtuo nga makuha niya ang nasangpit nga posisyon ilabina nga bag-o pa lamang siya nga kongresista.

Nagtuo si Ocampos nga ang iyang mga kauban nga kongresista adunay dakong pagsalig kaniya hinungdan nga gisangonan siya sa maong posisyon.

Gituohan nga usa sa nakapakombinse nga mahatag kaniya ang nasangpit nga posisyon ang iyang perfromance niadtong nakalabay nga May 10 elections, ilabina nga sa tibuok Mindanao sa Misamis Occidental lamang si Presidente Noynoy Aquino III ang migawas nga mananaog.

Gani walay miparang ni Ocampos sa maong posisyon.

Ang nakuha nga posisyon ni Ocampos nagtala na usab og laing kasaysayan sa Misamis Occidental ilabina nga unang higayon nga ang representante sa segundo distrito sa lalawigan nahimong presidente sa tanang kongresista sa Mindanao.
Sibo sa kasaysayan, si Ocampos ang ikatulong kongresista sa ikaduhang distrito sa Misamis Occidental.

Si kanhi kongresista Hilarion ‘Nonoy’ Ramiro, Jr., ang unang reprsentante ug human nga makakompleto sa iyang tulo ka termino, ang iyang asawa, karon Governor Herminia Ramiro mao ang nahimong ikaduhang kongresista.

Dugang ni Ocampos nga posible nga igo lamang siya nga nagpahimulos karon sa bunga sa iyang mga kahago ilabina nga iyang gibarugan nga ipasibaw ang kandidatora ni Nonoy Aquino sa Liberal Party.

Nasayran nga manumpa si Ocampos isip presidente sa unang semena sa Disyembre.(NEPTALIE BATOLENIO)