DVD ni Pacman ug Margarito mikatag sa Ozamiz

WALA pay singko minutos human sa away ni WBC superwelterweight champion Manny ‘Pacman’ Pacquiao ug Mexican-American Antonio Margarito niadtong Dominggo, mikatag na ang mga DVD copy niini sa mga baligyaan sa Ozamiz City.

Gipadayag sa usa ka tigbaligya nga nagpatago lamang sa ngalan nga Dionesia nga adunay duha ka klase nga kopya ang ilang DVD nga gibaligya sa nagkadaiyang bangkita sa Ozamiz.

Saysay niini adunay DVD nga ang away lamang ni Pacquaio ug Margarito ug ang laing klase apil na ang away sa nga undercard fights.

Hinuon, gipadayag sa mga namaligya nga walay kalainan ang presyo niini nga mapalit gikan sa P30 ngadto sa P35 ang matag kopya.

Gidugang sa namaligya og DVD nga nagpatago sa ngalan nga Dionesia nga labing halinon karon ang away nila ni Pacman ug Margarito.
Nasayran usab nga walay nahitabong pagpangdakop sa mga pirated nga DVD sa Ozamiz City sukwahi sa nahitabo sa kaulohan.

Kahinumduman nga niadtong Lunes si Ronnie Ricketts, chairman sa Optical Media Board (OMB), milusad sa pagpangdakop sa pirated nga DVD lakip na ang DVD nga adunay away ni Pacman ug Margarito didto sa kaulohan.

Nasayran nga sa Misamis Occidental, ilabina sa Ozamiz City walay nahitabo nga pagpang-ronda sa mga pirated nga DVD sa katarungan nga walay mga gi-deputized ang OMB sa lalawigan.

Nasayran nga sa matag-away ni Pacquaio dali kaayo nga makapagawas ang mga mamaligya og pirated nga DVD ang Ozamiz.(NEPTALIE BATOLENIO)