2 patay, 2 bata angol sa pagpamosil

OZAMIZ CITY--DUHA ka managlahing pagpamosil ang nahitabo nga mipatay sa duha ka biktima ug misamad sa duha ka mga bata ang nahitabo sa Ozamis City, niadtong Nobiyenbre 17 sa may alas singko sa buntag.

Sa imbestigasyon nga gilusad sa kapolisan, nasayran nga ang usa ka Leo Gesulga y Tinam-isan, 34 anyos ang pangidaron, nagpuyo sa Carmen Annex,Ozamiz City naglakaw kini sa dihang giposil sa wala mailhi nga mga suspetsado.

Nakaagkon og samad pinusilan sa iyang dughan ang biktima nga maoy gituohan sa iyang hinanali nga kamatayon.

Lima ka samad pinusilan ang naangkon sa biktima. Gitutukan usab sa kapolisan ang angulo nga posible nga holdap anng nahitabo tungod kay nawala ang pitaka sa biktima.
Samtang dungan sa maong hitabo, laing pagpamosil ang natigayon sa barangay Baybay Maningcol, Ozamiz City.

Ang biktima usa ka Eleazar ‘Nonoy’ Conde, 31 anyos ang pagidaron; Clent Conde, 3 anyos ug Jijie Conde tulo ka bulan ang pangidaron.
Sa imbestigasyon, milutaw nga ang mga biktimang amahan ug mga anak nagdula-dula kini sulod sa ilang kuwarto apan kalit lamang nga mipaka ang tulo ka sunodsunod nga buto.

Human sa buto-buto namatikdan nga wala nay kinabuhi ang biktima nga si Eleazar samtang ang duha ka mga bata nakaangkon og samad sa ilang paa.
Si Clent, tres anyos nga bata nakangkon og samad sa paa ug ang igsoon niini nga si Jejie nga tulo ka bulan pa lamang nakangkon og samad sa iyang paa og gituohan nga milapos sa sampot nga bahin niini.

Sa pagkakaron wala pa maistablisa sa kapolisan ang motibo sa maong pagpamosil.
Kahinumduman nga niadtong, Nobiyembre 16, giposil-patay usab ang usa ka Nicholas Medija, 59 anyos ug magtutudlo sa Ozamiz City National Hig school (OCNHS) samtang nagmaneho sa iyang motor single padulong sa eskuylahan gikan sa iyang panimalay.

Paghidangat niini sa Barangay Maningcol sa National High Way giatangan kini sa wala mailhi nga mga suspetsado ug giposil. Nakangkon og samad sa iyang dughan nga maoy gituohan nga hinungdan sa iyang hinanaling kamatayon.

Sa pagkakaron blangko pa ang mga sakop sa kapolisan sa motibo sa maong hitabo.
Nasayra nga naalarma ang mga residente sa sunod-sunod nga nahitabo nga pagpamosil.(NEPTALIE BATOLENIO)