MisOc adunay armadong grupo--Yape

OZAMIZ CITY--Giangkon sa hepe sa  Misamis Occidental Criminal Investigation and Detection Group (CIDG), Police  Chief Inspector  Joie Pacito Yape  nga tinuod nga dunay private armed groups (PAGs)  sa lalawigan.

Ang  pamahayag ni Yape maoy dason sa una na nga  gibulgar ni  Misamis Occidental 2^nd district Congressman Loreto Leo Ocampos nga adunay PAGs sa lalawigan.

Subay sa giingong presensiya sa  PAGs  sa Misamis Occidental, usa kini sa tulo ka mga probinsiya nga gitutokan sa PNP ug AFP  ug kalakip nini ang Abra ug Masbate. 

 Gumikan sa maong kahimtang, gipadalhan ang  Misamis Occidental ug  special task force aron maoy mobungkag sa nasangpit nga grupo isip sanong sa hangyo ni   Ocampos.

Gipadayag ni Ocampos  nga wala siya magtuo nga  ang task  force maoy ipadala sa lalawigan sanglit ang iyang gipangayo mao lamang ang pag tabang sa lihok sa kapolisan sa lalawigan ilabi na sa dakbayan sa  Ozamiz, sa dihang  nagsunod sunod ang  mga krimen sama sa patay, hold up, tulis,  carnap ug uban  pa.

Apan gipasabot ni Yape nga  daghan ang nagbaton ug private armed groups ug nasayod ang tanan kon si kinsa man ,apan  mihangyo lamang ang CIDG Chief nga dili na angayan nga hinganlan pa kon si kinsa, kondili  mas maayo nga magtinabangay lamang ang matag usa.

Una niini, gipahayag ni Governor Hermie Ramiro, nga duna siyay nahibaw-an nga  private armed, groups, apan  gusto niyang ang kapolisan mismo maoy moyagyag niini.

Ang pamahayag ni Ramiro gihimo atol sa gipahigayon nga emergency meeting sa mga sakop sa Provincial Peace and Order Council.

Kahinumduman nga pinaagi sa task force, naglaum ang katawhan nga  masumpo ang mga panghitabo sa lalawigan ilabi na sa dakbayan sa  Ozamiz nga nakahatag ug kabalaka ilabi na sa mga negosyante.

Nasyaran nga gumikan sa maong mga krimen., gikonhuran ang oras sa pagbukas sa mga tindahan  sa tuyo nga sila  dili na kaayo magabhian sa ilang pag serbisyo  ngadto sa katawhan.

Subay niini,  sila si Ocampos, Ramiro ug Yape managsama ug awhag ngadto sa publiko, nga unta magtinabangay ang tanan aron masumpo ang nagkadaiyang krimen sa lalawigan ilabi  na sa dakbayan sa Ozamiz  ron mahibalik ang  pagsalig sa mga dumuduong  sa kahusay ug kalinaw .  (MARILYN TORIBA WITH REPORTS FROM BALITA PATROL)