Mga bise gobernador sa Mindanao magtagbo sa Ozamiz City

OZAMIZ CITY--DILI babag alang sa League of Vice-Governors of the Philippines (LVGP) ang giingong ‘stigma’ sa Misamis Occidental ilabina sa Ozamiz City nga adunay armadong grupo ug dapit sa Kuratong Baleleng sa pagpahigayon sa duha ka adlaw nga Mindanao 1st Island Conference, Oktobre 8-9, 2010.

Gipadayag ni Misamis Occidental Vice-governor Henry Oaminal nga bisan pa man nga nabutang sa ‘limelight’ ang lalawigan gumikan sa balita sa Partisan Armed Groups (PAGs) ug Kuratong Baleleng apan nauyonan pa gihapon sa kahugpungan sa mga bise gobernadores nga ipahigayon sa lalawigan ilabina sa Ozamiz City ang ilang panagtagbo.

Dugang ni Oaminal nga ang mga dili maayong balita sa lalawigan ug sa Ozamiz City maoy nakapahagit kaniya nga mo-host sa Mindanao 1st Island Conference aron mapakita sa mga bise gobernador sa nagkdaiyang dapit sa nasud nga malinawon ang Misamis Occidental.

“This will be our opportunity also nga mapakita nato nga malinawon kita sa Misamis Occidetal ngadto sa tibuok nasud,” padayag ni Oaminal.

Gipasabot ni Oaminal nga bisan pa man nga alang lamang kini sa mga bise gobernador sa Mindanao ang maong kalihukan apan aduna nay mga bise gobernador sa Visayas ug Luzon nga mipadayag og interes sa pagtambong niini.

Nagtuo usab si Oaminal nga gawas nga mapakita ang kamalinawon sa lalawigan dako usab ang mahimong epekto niini alang sa maayong dagan sa ekonomiya ug pag-promote sa tourism industry. Usa sa hisgutan sa maong panagtagbo ang may kalambigitan sa pagpatunhay sa dagan sa kahusay ug kalinaw sa Midanao.

Si Teresita Deles, presidential adviser on the peace process mao ang pinasidunggan nga bisita sa duha ka adlaw nga panagtagbo sa mga bise gobernador. (NEPTALIE BATOLENIO)