Media gipailalom sa gender sensitivity seminar

SA pagtuo nga dako og ikatabang ang mga sakop sa media sa pagpasibaw sa hilisgutanan sa ‘gender sensitivity’ gipailalom kini sa usa ka adlaw nga seminar, niadtong Oktobre 6 sa Oroquieta City.

Gipadayag ni Maribel Gonzales, tinugyanan sa Provincial Gender and Development Center (PGADC) nga gituyo nga ipailalom ang mga sakop sa mga tigbalita sa lalawigan sa Misamis Occidental sa seminar on gender sensitivity for media practitioners sa tumong nga mapalapnag ngadto sa katawhan sa nasangpit nga hilisgutanan.

Saysay ni Gozales nga ang mga sakop sa media usa ka epektibo nga partners o kaabag sa gobiyerno ug sa civil society sa pagpasibaw sa mga nagkadaiyang kalamboan.

Dugang ni Gonzales nga ang media dako og papel nga gidula diha sa pag-promote sa gitawag nga gender-responsive organization ug gender friendly print ug broadcast media ouputs.

Sa maong seminar, gituki usab ang papel sa mga sakop sa media ilabina sa pagbalita sa mga sensitibo nga mga isyu nga nagtumong kababayen-an ug kabataan. Gisaysay usab niini ang Republic Act 9262 o Anti-Violence Against Women and their Children.

Human sa maong seminar gimugna usab ang kahugpungan nga Media for Peace nga nagtumong kini sa pagpasibaw sa gender sensitivity issue.(NEPTALIE BATOLENIO)