Echavez ug Ocampos posible nga mag-uban og partido

OZAMIZ CITY--BISAN pa man nga medyo init ang word war tali sa hepe ehekutibo sa Ozamiz ug sa representante sa segundo distrito apan posible nga mahimong magkauban na usab sila og partido.

Gipadayag ni Ozamiz City mayor Nova Princess Parojinog-Echavez nga bukas siya sa posibilidad nga mahimong motapo siya sa Liberal Party tungod og alang sa kaayohan sa katawhan sa Ozamiz.

Gidugang ni Echavez nga kon makita ni Presidente Benigno “Noynoy” Aquino III ang iyang gihimong suporta sa mga programa niini posible nga mahanyagan siya nga motapo sa nasangpit nga programa.

“Gani I am entertaining on that wala gyuy problema sa ako nga motapo sa partido”, padayag ni Echavez.

Saysay ni Echavez nga aduna na siyay nakuha nga pasiuna nga impormasyon gikan sa kampo sa Liberal Party sa Region 10 sa maong pag-ambak niya og partido.

Gidugang sa pagsugilon ni Echavez nga sa pagsugod pa lamang sa paglingkod ni Presidente Aquino misuporta na siya niini hinungdan nga sa dihang giimbetaran siya nga matambungon sa inagurasyon iya kining gitambungan.

Padayag ni Echavez nga walay problema kaniya nga kon mag-uban sila ni Misamis Occidental 2nd District Representative Loreto Leo Ocampos og partido ilabina nga kon kini nagtumong alang sa kaayohan sa katawhan sa Ozamiz.

Saysay ni Echavez nga sa politikanhong aspeto ug sa pagpanerbisyo mahimo sila nga magka-uban ni Ocampos apan sa personal nga aspeto dili mahimo.

“I can set aside anything kon gikinahanglan nga mag-estorya mi (Ocampos) alang sa trabaho ug sa public service but sa personal its another issue,”hinapos sa mayor.
Kahinumduman nga nagkauban si Echavez, former Ozamiz City mayor Reynaldo ‘Aldong’ Parojinog, Sr., ug Ocampos sa partido Lakas apan milukso si Ocampos sa Liberal Party niadtong nakalabay nga piniliay human nga wala makuha nga mahimong standard bearer sa segundo distrito sa partido Lakas.(NEPTALIE BATOLENIO)