SCALA nakatabang sa mga out of school youth sa Ozamiz

GIANGKON sa mga kadagkuan sa Sharing Computer Access Locally and Abroad (SCALA) nga daghan na sa mga out of school youth (OSY) nga mipa-enroll sa maong programa ang natabangan ilabina sa natad sa panginabuhian.

Gipadayag ni Segundo Unos, SCALA center manager nga mga 90 porsiento sa ilang mga graduates ang nakasulod og maayong trabaho. Iyang gidugang nga aduna na silay mga produkto nga nakagawas na sa nasud human nga makakompleto sa pagtuon pinaagi sa SCALA program.

Dugang niini nga adunay wala makatrabaho sa gawas sa nasud apan anaa sa mga dagkong estbalisemento sa dakbayan ug sa kasikbit nga mga lalawigan.
Pasabot ni Unos nga nahimong epektibo ang nakat-onan sa ilang mga tinun-an gumikan usab sa mga maayong instructors sa ilang buhatan.

Sa pagkakaron sugdan na usab ang ika 24 ug 25 nga batch alang sa lain na usab nga pagtuon sa mga OSY sa SCALA program.