MisOc midayeg sa kadaugan ni Pacman

OROQUIETA CITY-- GIDAYEG sa katawhan sa Misamis Occidental ang kadaugan ni pound for pound king Manny ‘Pacman’ Pacaquiao batok ni 4 time world champion Sugar Shane Mosely .
Gisaksihan sa katawhan sa lalawigan ang panagharong ni Pacman batok ni Mosely pinaagi sa live streaming sa mga nagkadaiyang mga kan-anan ug sa big screen nga gi montar sa Medina Gymnasium ug sa Oroquieta City Gym pinaagi ni Misamis Occidental governor Herminia ‘Hermie’ Ramiro.

Nasayran nga sa matag-away ni Pacquiao nahimo na nga batasan ni Ramiro nga mopahiluna og big screen aron libre kini nga makita sa katawhan sa lalawigan.

Sa matag buhi ni Pacquaio nga moigo ngadto ni Mosely dunganan usab kini sa suliyaw sa katawhan ug labing miugong ang singgit sa manan-away sa Medina gym sa dihang mihagba si Mosely sa round 3 sa dihang naigo kini sa kombinasyon.

Sa dihang giiphan sa referee ang pagtuklod ngadto ni Pacman, dungan usab nga misuliyaw ang manan-away saw ala pagka-uyon.
Apan human niadto nga nagsugod na usab si Pacman mibuhi og sunod sunod nga kumbinasyon hangtud sa katapusang round nga nakapahubag sa nawong ni Mosely.

Sama sa gidahuman, sa dihang gipakanaog ang unanimous decision pabor kang Pacman misuliyaw ang katawhan.

Hinuon, nagbagolbol ang uban tungod kay gusto nila nga ma-knock out si Mosely.(NEPTALIE BATOLENIO)