Cancer vaccination awareness gipahigayon sa Ozamiz

Sa tuyo nga mahatagan og igong kasayuran ang mga kawani sa nagkadaiyang buhatan sa local nga pangagamhanan, gipahigayon ang Cancer Vaccination Awareness sa Ozamiz City Hall niadtong Marso 7.

Ang maong kalihukan gitambungan sa mga representante sa clustered offices sama sa buhatan sa mayor, budget, human resource management, legal, general services Office, Nutrition, ug City Administrator’s Office.

Si Dr. Lemuel De los Reyes, usa ka general practitioner sa iyang pag-ka mananambal ang mihatag sa lecture sa buhatan sa mayor.

Usa sa iyang gihatagan ug gibug-aton sa iyang lecture ang vaccination sa cervical cancer alang sa mga kababayen-an, sanglit anaa karon sa pag-saulog ang mga kababayen-an sa Women’s Month niining bulan sa Marso.

Nasayran nga adunay dose mil ka mga kababayen-an ang mamatay matag adlaw sa nasud ug kinyentos ka libo ka mga kababayen ang mamatay matag adlaw sa tibuok kalibutan gumikan sa cervical cancer.

Tungod niini nanawagan si De los Reyes sa mga kababayen-an nga dili nila ihikaw ang pag-pabakuna alang sa pag-sumpo sa cervical cancer ug ingon man usab sa panawagan nga gikinahanglan gayud ang pap smear matag tuig alang sa mga kababayen-an.

Giodugang ni De los Reyes ug iyang gikonpirmar nga taas ang incidente sa cervical cancer apan may kahigayunan usab nga masumpo ang maong sakit kun mahatagan og importansiya.

Sa samang higayon gitutokan usab sa maong lecture ang Influenza Vaccine kun mga trangkaso, diin nakita usab ang kamahinungdanon nga mabakunahan ang tawo ilabina ang mga bata nga mao ang dali nga mataptan sa mga sakit.

Usa sa nailang killer nga sakit mao ang H1N1 ang gikahadlokan sa tanan.

Tungod niini gipahinumduman ni Delos Reyes ang mga empleyado sa City hall ingon man sa mga katawhan sa dakbayan nga i-value gayud sa usa ka tawo ang vaccination aron masalbar ang kinabuhi.