Sinacaban, gihugtan ang seguridad

SINACABAN, MisOc—Labing gihgugtan niining lungsod ang pagpatunhay sa dagan sa kahusay ug kalinaw gumikan sa sunod-sunod nga mga nahitabong krimen.

Gipadayag ni Sinacaban municipal Mayor Dello Lood nga gumikan kay daw naalarma na siya sa sunod-sunod nga panghitabo sama sa carnap, hold up ug tulis nga nahitabo sa iyang lungsod hinungdan nga gipalagsik niini ang pagpatunhay sa dagan sa peace and order.

Gisaysay ni Lood nga labing gipatuman ang pagbantay sa mga coastal barangays sa iyang lungsod tungod kay daghan nga mga krimen ang nahitabo sa maong dapit.

Dili pa lamang dugay mipahigayon sa panagtagbo ang buhatan sa mayor ug sa mga sakop sa kapolisan sa maong dapit aron tukion ang nasangpit nga hilisgutanan.

Saysay ni Lood nga sukad sa iyang pagka-opisyal sa maong lungsod karon lamang niya nasinati nga mitaas ang krimen sa maong dapit.

Ang obserbsyon ni Lood misuporta sa una nang pahayag ni Misamis Occidental 2^nd District Boardmember Edwin Florida nga mitaas ang mga krimen sa lalawigan sibo sa iyang pagsuhid sa nagkadauyang Philippine National Police (PNP) stations.

Gani naalarma siya sa pagsaka niini.

Sa iyang kabahin gipadayag ni 1^st District Boardmember Inocencio Pagalaran, Jr., chiarman sa committee on Budget, Finance and Appropriations ug sa committee on police, peace and order, fire services, jail management and disaster preparedness nga kinahanglan nga matutukan usab ang maong taho nga misaka ang crimerates.

Saysay niini nga kinahanglan nga mahatagan og saktong suporta ug budget ang gitawag og ‘five pillars’ nga mao ang Community, The Law Enforcement, The Prosecution Service, The Courts, ug ang Correctional Institution.

Kahinumduman nga gumikan sa pagsaka sa krimen, una na nga gisaysay usab ni Misamis Occidental 2^nd District Congressman Loreto Leo Ocampos nga kadaghanan niini gumikan sa kahimuan sa armadong grupo hinungdan nga gipadala ang ‘Taskforce Lion’ nga gitahasan sa pagbungkag sa giingong ‘partisan armed groups’ (PAGS) sa lalawigan.(NEPTALIE BATOLENIO)