PAMAHAYAG sa NUJP-OZAMIZ sa PAG-ATAKE SA SAKOP SA MEDIA

Ang NUJP hilabihang naalarma ug naguol sa pagpangatake kang Danny Pilar pinaagi sa usa ka granada nga gilabay sa iyang panimalay didto sa Taboo, Jimenez niadtong adlaw’ng Dominggo, Disyembre 20, 2009. Si Danny kabahin sa komunidad sa mga tigbalita sa Misamis Occidental.

Bisan paman nga ang usa ka halalom nga imbestigasyon ang kamulo’ng gipahigayon kalabot niini, among gipasalamatan ang Philippine National Police (PNP), ilalom sa liderato ni Supt. Leonilo Cabug, provincial director sa Misamis Occidental, sa paspas nga pagresponde sa panghitabo. Hinaut nga masustenir kining paningkamot sa pagsulbad sa kaso aron makaangkon og hingpit nga hustisya si Danny Pilar.

Dili madiskwento ang posibilidad nga ang pagpangatake adunay kalambigitan sa pulitika ug ang trabaho ni Danny isip tigbalita. Nahitabo kini human maplastar ang kandidatura sa mga pulitiko alang sa nagkadaiyang posisyon. Gani, matud ni Danny, kung adunay nag-interes sa iyang kinabuhi tungod sa lain pang rason, kaniadto ra siya hamyang kaayo sa pagpangatake.

Tungod niini, among gihangyo nga unta malinawon nga pamaagi ang ipatuman sa mga pulitiko subay sa ilang personal nga interes nga maagni ang katawhan sa pagdapig sa ilang tagsa-tagsa ka kandidatura.

Sa maong panghitabo, among giawhag ang mga pulitiko nga mosaad atubangan sa katawhan nga magdumili sa dugoon nga mga paagi aron mapalawig ang kinaugalingong pulitikanhong interes.

Ang pagpapili sa pulitikanhong posisyon usa sa mga hulagway sa pagtunhay sa demokrasya. Kaubang hulagway niini ang kagawasan sa pagpadayag.

RYAN D. ROSAURO
Chair Disyembre 22, 2009